Ginsong Vualzong, Ka pa.

Ginsong Vualzong, Ka pa.

Kum 71 vel a upa ahi ta ka pa. Amah hi Bungpilon suak, a pianna Bungpilon ngaina mahmah khat ahi. Liahkai akipan Tungin - Kaikhogin - Ginsong - Ginzalal - Songsuanding chih dan ahi ka khanggui uh paidan. Lehkha sim ana lunglut kholkei a, laisim sangin lawi chin bang ana ut zaw a, class VIII tan ana zou lel hi. Tualtei mahmah leh lawm pawl nuam mahmah khat ana hi. Inn a tut maimai sangin in-kiim in-kiang hahsiang khong a ut zaw hi. Houlim a ut a, lawm polh nuam a sa a, mi'n le polh nuam sa uhi. Kei lawm te bang le lawm bawl in, ka in ua ka lawm hong hawh kha ten nuam sa thei mahmah uhi.


Lehkha sau ana sim louh ziak mahin, lekha siam te a ngaisang a - lehkha siam dingin honna hasot gige hi. Mi taima mahmah khat ahi a, zingsang i thoh ma in mun tuamtuam Bungmual, Pearson leh Lamka khosung te ana fang suak man zel hi. Zingsang a pawt teng in lampi nawl a suang om te khat hon paw gige a, huai te hon kholkhol chiang in tampi mah hon pha in, phatuam pi suak hi.

District Malaria department akipan ana pension a, a pension nung in zong om maimai a ut louh ziakin JNV Tuinuom kianga ka gam ua taaksing leh singnou tuamtuam va suan zel hi. Niteng phial in timepass na kawm leh taksa sawizoi na kawm in lou va pha sek hi. A huchih ziakin a damtheihna lam a hoih mahmah a, Pathian vualzawlna in a damlouh ki za tamlou hi. Kei bang le khut nasep te hon sinsak a, khut a nek muh a haksak dan honna sinsak hi.

Agriculture leh Horticulture lam lunglut mahmah khat ahi a, Buangmung, Jeribam lam ah Rubber farm bang alawmte toh a bawl ua, tua banah ZEPEDA te agriculture tour leh activities te a zong va tel zel hi. Tua JNV kiang a ka gam ua nimbu, nahtang, zongtah leh haichi tuamtuam a chiing a, a gam a ka ten louh ziak un guta ten honna guk sak zel ziak un hoih tatak thei lou hi.

Tanau ngaina mahmah hi in ka thei hi. Ka neu lai ua pan in singtang lam a kipan tanau zin leh leng ka nei den uhi. Tua banah tanau te ka inn ua kipan khanglian hun khop om uhi.

A mizia a chiamnuih khah mi a hi a, meltheih a hau a, lawm zong a hau hi. Mi toh a kinak a kisel lam ka thei kha kei a, mi nunnem mahmah in ka thei hi. Siamsinpawlpi a ngaisang a, SSPP Life Member zong ana hi a, khotang vai a hih theihtheih ana hih zel hi. Sahkhua lam ah Saptuam Upa ahi a, Pathian thu hon gen pih gige a, thu hon ngetsak gige hi. Ka saptuam uh khateng magazine 'Gamdai A Kikou Aw' bang leng a hawm dingin ki volunteer a, magazine a suah chiangin a khe in walking kawm in va hawmsek hi.

Ka neu lai ua pan ana gen gige "Simple living high thinking" pen in amah described pen kasa. Simple mah leh chin na hinkhua ka et chiangin phakzoh na hi kei a, tuni in Father's Day ahih toh kiton in ZAHNA SALAM ka hon pia ahi pa aw.

[Written on June 15, 2014 ]


Print   Email