Ka pianna vangkhua Phailian

Ka pianna vangkhua Phailian

Ka pianna vangkhua Phailian. (original name D. Phailien)


Phailian khua i chih Lamka a dia khua om masa pawl ahi a, veng thak New Lamka, Simveng, Beuhlalane, Lailam Veng etc te omma pek a khua a na omsa khat ahi. Kho dang Bungmual, Pearson, Hiangtam Lamka, Zenhang Lamka, Muolnuom etc te toh khua a ki-sat kum ki bang phial ding in ka gingta hi. Hausate khua saat ahih ziakin Phailian, Bungmual leh adg dg te veng kichi lou in 'khua' ana kichi hi.


Phailian i chih Dala Neitham in ana saat ahi a, a kisaat kum ka na chiamteh kha chet kei hi. A tung in Phailian i chih tua New Lamka lak Dorca Hall lak, Rayburn College om pheina lak ah ana om ahi. Huai lai a heutute'n a lem zawkna dingin mualtung lam a ten vek ding, phai zaang a buhlei bawl ding a chih ziakun, tua Phailian mun ah khomite pemtou uh ahi. Gelmual hausa pa in single barrel khat a tua Phailian mun pen ana piak chi in kithei hi.


Huai ziakin kou bang le Rayburn college suk teng buhlei lianpi kana nei kha uh hi. Amau gam ahih ziakin, tua Damkam Bazaar i chih bang le Phailian a Royal Academy te pu mintam a ki bawl ahi. Kei theihphak tan in Rayburn college kong lak a buh aat dingin ka pa te bong-gari in ka va zui kha sek hi.


Phailian i chih nam teng tenkhawmna hi a - Paite, Thadou, Simte, Vaiphei, Zou, Gangte, Meiteite nuamtak in ana tengkhawmna uh ahi. A sung a tengte'n eimi pau teng thei ua, Paitepa in Thadou pa Thadou pau in houpih thei a, Thadoupa in Paite pa Paite pau in houpih thei hi. Huchi in kumsawt pi nam tuamtuam nuamtakin ana teng khawm uhi. Himahleh vangsiat huaitakin 1997 kum a nam kikal buaina ziak leh a tengthak khenkhatte ziakin nasatak in thilnuam lou zaak ding hong om sek hi. Tua banah meitei leikai zu dawnna mun a om ziak takin, buaina gen di om sek hi. A gal akipat in Phailian khua a buaina om chih khong i zak chiang in, nuam kisa kei a, ki-awlmawh sek hi. Mi dang ten chiamnuih hiam ahih kei leh hon demsak chiang bang un, ki-feel mahmah sek hi.


Bang teng hi leh kapu kapa ana tenna, ka pianna vangkhua Phailian ahi a, midang ten hon gensiatsak leu le ngaihnat huai ka sa hi. Pianna vangkhua ngailou kua om diam maw...?


NOTE: Wrote on my Facebook Wall on 21st May 2014.


Print   Email