Piangsual ki khel lou

Piangsual ki khel lou

Tulai i society sung ua kampau khenkhat i zatte uh ki et thak poimoh sakna lian mahmah in om hi. Society sung a ana tuam deuh mi piangsual te, zi-le-pasal toh ki khen, meithai leh adg. dg. te chiamnuih bawl leh kampau simmoh taka zang bang zak in om sek hi. Huai "nuthoi" "pathoi" "khebai" "mi neu" chih dan kampaute zang bang i om lai man un poi kasa mahmah hi.

Khovel i damsung a i maban a i tuah ding kuaman ki thei lou ahi. Thupil in "Piangsual ki khel lou" ana chi hi. Pathoi, nuthoi, meithai, khebai di ki khel lou ahi, maban ah kua peuhmah in i tuakthei vek uh ahi. Pathoi, nuthoi te le a ut mawng ua thoi uh hi lou uh ahi. Khenkhat bang social media bang a khoih ua leh nuthoi pipi facebook khoih, facebook a pasal zong ahi di maw khong chia kampau zang bang ki om mawk ahi. Facebook zat bang le frustrated luat ziaka lungsim divert-na a zang bang uh le hi maithei uh ahi. Tuahsia (accident) tuah ziaka taksa bukim lai pi piangsual theih ahi. Pathoi, nuthoi leh piansual ziaka bukimlou hi tuan lou uh ahi, miteng bang a ngaihtuahna leh thilhihtheihna nei veve uh ahi.

I kampaute kivel thak ni kua peuhmah in. Aki simmoh thei di om khang. Give respect, earn respect!

[Written on May 17, 2014]


Print   Email