Neulai Independence Day

Neulai Independence Day

Tuni Lamka a Independence Day zatna a school naupangte parade ka muh leh ka neulai a Independence Day kizat sek dan ka phawk khia hi. Neulai in Independence Day, Republic Day chihte Lamka ah nasatak in kizang sek a, Lamka khosung a dia ni poimoh mahmahte ana hi sek uhi. Khozaang phial in ki-uap sek a, Lamka mawltual kimkual ah mipi tamthei mahmah hi. Nalhthei pen in ka nu'n hon chei a Lamka Mawltual lam zuan in phurtakin kazuan uhi. Midang ka lawmte le huchi bang bok in, a nute-pate chiat uh zui uh hi.

A mun i tuntak in mipi ground kiimkual in ana dim mitmet uhi. Paradete kimu phabaanlou ahih manin, ka nu in a liang a hon tuangsak in mipite phusuk in, first line lak ka tangpha uh hi. Huchi in program hong kipan in school tuamtuam a kipan Parade hon nei ua, et lawm leh siam kisa thei mahmah mai hi. Parade teng a bei zoh in show tuamtuam - cultural shows, kungfu shows, magic show chihte etnop kisa thei mahmah hi. Shows tuamtuam et kom a nek dingin ka nu in chana nawi leh lengthei hon leisak a hampha ka kisa lotel hi. Mipi tamlua ahih chiang in nute toh kisuk mang di bang kilau lotel in, a va pawtkhiat zek uh leleng kinung et-et kha sek hi. Huchi in Independence Day zangkhin inlam ka zuan kik ua, huai ni bel Independence day zatdan kia houlimna in kinei hi.

[Written on August 15, 2014]


Print   Email