Post Birthday thoughts

Post Birthday thoughts

Zan ka pian champha toh kisai a deihsakna thuchah hon pe tengteng tung ah kipahthu ka gen thak hi. Kum 20 vel di ka ki sak lai in, theihlouh kal in late 30s bang kana hi ta mawk a, ut leh ut louh thu hi nawn lou in, hun in hon mualliam san zungzung ta mawk hi.

Pathian vualzawlna ziakin age group tuamtuam toh ka ki pawl thei a, naupang chikchik toh bang kikum thei in, hu chi dan mah in sang a upa te toh bang lawm bang in ki pawl theih in om hi. Zogam.com ana ki pat khiat ziak leng ahi ding a, mi tuamtuam toh ki polh khak in ana om a, theihna ki behlap mahmah a, zil di zong tam mahmah hi. Huchi kawmkal ah lawm ginomlou bang le kana tuak kha tham a, amau te ziakin ki bawlthakna di opportunity ka mu a, phatuam veve hi.

Mihing i damsung in hun nop kia i pal kei a, hun haksa i tuahni le a tam hi. Hun nuam ah lawm i hau a, hun haksa ni in a taktak te hong ki sep khia hi in ka mu. Hun haksa i tuah lai a ginom taka honna ompih lawm le vual te phat huai kasa a, hampha ka kisa. Mi tung a thilhoih i hih te direct in return ki mu kei mahleh, Pathian in lampi tuam a hon vualzawl zel ahi chih ka phawk thak ni. Thil hoih hih chimtak kei ni.

Tangkhat hin khua sawt kuam kana zat nung in, Pathian in kei kia ka om om hoih sa lou ahi ding a, ka lawm dingin Hoihpinieng hon pia a, vualzawlna thupi tak ka tang hi. Pinieng in a hon itna te thupi kasa a, ka thawmhauhnate hon mangngilh sak a, ka zi ahihna kia hi lou in ka lawm hoih pen ahih manin a tung ah kipahthu ka gen a hi.

Leitung a khualzin lel i hi ua, hun hong paipai dia teek lam i manoh chiat ding uh. I niteng kalsuan na i experiences te akipan i zil khiatte uh i tate, i tute hilh sawn thei dingin Toupan i vek un damna hon pe ta hen!

[Written on September 25, 2014]


Print   Email