Thumvei mahmah ui in hon kei ta!

Thumvei mahmah ui in hon kei ta!

Ui keih na gengen ua, kei experience kon gen deh...Thumvei mahmah ui in hon kei ta. Li vei chih di chu ahi na a, khat pen zaw Jean khekol a sah ziakin hon kei kok zou lou a, ka sim tel dah mai di.

Shillong 1994 kum a PU (class 12) ka sim lai un, ka lawmte inluahna inneite uithul in honna kei a, a hon keihna mun neu kha a keh hi. Tua nung sawtlou in kum tawp Lamka lam zin a hun pah hi. In ka tun a sung te kiah ka gen leh patau sim ua, gu hiip thei suang a chih te uh va la unchin hon keihna mun ah bang tan hiam hon belhsak uh hi. Ken la ginta hetlou. A ui hon kei pen a hai ahi kei a, a nei te le mi changkang mahmah ahi ua, vaccinate ahi ngei ding un ka gingta. Bangmah ka chi sam kei.

Delhi 2012 kum ahi de aw, nitak inn ka kiik a lampi a stray dog uinou khat ka gari a goi phei kha ing a. Bang a chi de aw chi a khol kawm a ka nung et leh a pi in hon boh phei zot in chin ka khe taklam hon keih sak ek. Inn ka tung a ka et leh ka savun khedap bang kei paileh hial eivele. A hatu in ka khepek nip na zawn lak a keihna lut thuk sim ahi dia, si bang le tam sim pawt dan ahi. Kei le patau in lawm Thuamsiam loinu nurse call pah ngal, aman le tuisiang in ama sop siang in la zingkal chiah Safdarjung Hospital casualty ah va ki ensak in hon chi. Amah Safdarjung Hospital a sem le ahi a, thil pai dan ana thei lotel in chin nuam lotel. Tua banah Ui keih damdoi Delhi mun a athawn a muhtheihna omsun Safdarjung Hospital ana hi zomah hi.

Huchi in zingkal baihtak in Safdarjung Hospital Casualty ah kava ki ensak hi. Sagih vei mahmah honna kap ua, ui hon keihna mun a nihvei, ka taw phe te gel a nih vei, ka ban te gel a nihvei. Tuah zoh Dog Bite Department ah Rabies damdoi khatvei va ki kap sak lai. Huai zoh kal 5 sung regular taka Rabies damdoi ki kapsak nawn. A kikap sak thu tuam hi ta leh queue a din mahmah nin huai kasa. Safdarjung hospital kia a ui-keih damdoi muhtheih ahih manin mi tam thei mahmah a, queue sau thei lotel. Ka kin sim chia Thuamsiam zi phone in, aman huai mun a nurse te ana houpih a leh hon sam chat zel ua, hon kap pahpah thei ua kipah huai lotel.

Huchi in a kum nawn lam in huai ui nuta te mah in khatvei honna kei non uhi. Honna chiamteh uh ahi diam ah haha. Safdarjung Hospital Casualty va tung nawn. Himahleh tetanus kia honna kap uh. Doctor nu'n Rabies damdoi course complete na hih tak ziakin kap ngai non lou na hi hon chi. Hiai hon chi bangzaw nak nop lotel!

[Written in December 31, 2014]


Print   Email