Copyright toh kisai ngaihdan

Copyright toh kisai ngaihdan

Tulai Copyright thu non hah gen sim ua, ka ngaihdan leh muhdan hiai dan ahi.

E-media ah kum 11 val kana bualta sam a, copyright toh kisai buaina kana tuak zeuhzeuh sam hi. Internet khovel ah copyright function taktak lou ahi chih ka muhsuah khat ahi. Ei a bang le mi'n ana la un, en le mi a i lakkhak chang bang le om sam ahi. Zogam.com a suah di article hon piakte bang uh, ngetna om sese lou in local paper leh magazine khong ah ana suah sek uhi. Amau bel sum muhna a nei un, a changchiah nuam lou sak hun om sek hi. I khut ngeingei a i gelh news leh articles khong baihlam taka hon copy ua, source bang hon gelh sak kei ua leh nuam hetlou sam hi.

2008 kum in YPA Hall New Lamka ah Media leh Copyright tawh kisai seminar Zogam.com min in kisai kha hi. Huai ah thupukna ahih leh i gam ah Copyright implement na di hial in i dinmun un zil nai lou, tua ziakin media leh media te ki zahtakna dan in i lakna source ki gelh sak zel ni chih ahi. Himahleh hiai thupukna ki zui taktak tuanlou hi.

Huchi in hun hong pai zel in Facebook hong lut a, copyright toh kisai hong buai huai deuhdeuh ta hi. Facebook bang in Share button hon koih ua, informations baihlam takin hong ki thehzak hi. Click khat mek a copy theih mai ahih manin, phalna lou in na copy thei kei ding va chih tuntun pen thil awmlou hong suak hi. Huchi ahih manin i gen theih sunsun bel 'source hon gelh sak zel un' chih ahi mai.

Copyright i implement ut taktak leh government ah intellectual property i neihte uh register bawl leng kua mah in hon suhsak thei lou ding a, kepbit a om ding ahi. Government a ki register hial i hih kei le bel puak dan siam mai ngai dingin ka gingta hi. Huchi ahih kei leh la watermark khong limlak tung a gelh mai leng.

Ei mah leng ki et masak ngai kasa. En le national news khong leh gamdang news te source dang a pan ki la sawn ahi a, tua banah i computer zatte ua Windows 7, Microsoft Office, Photoshop, etc te license nei i tam het kei ding. Movie i download te bang uh le. Copyright bawhsia ngen i hi. Huai ziakin copyright va chi tuntun dah ni, ahih thei leh source ki gelh sak ni. Source gelhlou ana om tak leleng ki theihsiam tuah zel mai leng a hoih ding.

[Written on January 18, 2015]


Print   Email