Zonamkhandal

Zonamkhandal

Nidang in talpakte i gam khan dal ahi uh i na chi ua, tu in le zaw i gam khanna di bang tan hiam in dal lai mah un teh. Himahleh ei sung mah ah Zonamkhandal om ahi ta chi leng ki khial lou maithei ahi.

I gam puahphatna dia development fund contract nasep tampi hong lutte, a semkhe dingin eilak mah iki tuh uhi. Hiai development nnate sem ut in Ministerte maipha zong pawl toh, Singtang lam a mi muh va nei pawl toh, a langlang ah i diang sosouh uhi. I gam puahna di development nasep di teng i hong ki hawm bei ua, himahleh i gam ah khantouhna muhbeh ding tam hetlou hi. Tam hetlou chih phet, omlou chi leng ki khial lawmlawm ken teh. Huchi kawm kal in building nalh taktak, gari nalh taktak i gam ah pun beh a, mimal khantouhna nasatak in om hi.

Mipite i mawl thei lo lai uh. Hiai i gam development fund su thelthangte loi Chief Guest dingin i chei mawi zawmah lai uhi. Chief Guestte in sum tam pipi a hon piak ua leh gam ngaina, gam it peuh i sa uhi. Gam a ngaihnat uh leh i gam puahna di sum a muhte un i gam hon puah le uh gam a dia sem chih theih pat ding uh hi. I gam ah electric vak gina lou, tui nek gina lou, lampi gi na lou, public ground gina tak ki nei lou. Hiai te mitsin san a ka gam ka it chi in gengen in, sa sa leng le, i gam i puah tuan kei leh i gam khan daltu ki hi maimah ding hi. Tua ziakin i gam khan na dia semlou a mahni gil a lut sak te bel ZONAMKHANDAL hi uh hi.

Chik chiang in Zonamkhandal si aw, Zonamkhandal mang aw i chi ngam ding ua?

[Written on February 16, 2015]


Print   Email