MLA te'n sem hi na uh hiam? Bang chi teh ding?

MLA te'n sem hi na uh hiam? Bang chi teh ding?

Tulai in i MLAte un lampi hiam ahih kei leh koi hiam a nasep khat a neih chiang un i pakta mahmah ua, sem hoih lua i sa ua, khut bang i beng zuazua uh hi. Hun paisa a MLA lui te'n nna ana sep louh ziak ua, tua i MLAte un a hon sep zek uh leh sem sa lua i bang uh hi.

Group khat ka houlimna uah, MLA khat in a bial a electric a tunsak ziakin amah bial a nna semkhinta ahi bang a chi ua, ka va nui kha zozen hi. Mi nasep pakta utlou chih bang ka loh a, mak honsa sim uh hi. Nasep bel i kipahpih a, ahia nna khat a sep khit ziak a, abial a nna teng semzou dan a i ngaihtuah pen un i standard uh niamsak ka sa a, ka nuihza hi zaw ahi.

Ahih leh mihing khat nasep hoih leh hoihlou ahih kei leh nasep a fel leh fellouh bang chi'n i teh dia? Mi khat nasem in guai in la, kal khat a azoh di nna chi 10 na pia hi. Kal khat zawh in nna chi 2 chouh semzou ta leh sem hoih na chi diam? or sem hoih lou? A nasep zou zoulou ahih chiang in, sem hoihlou suak a, nasep fellou leh kizenlou suak hi.

Huchi mah bang in i MLAte uh a term sung ua a bial ua a nasep ding uh lam tuamtuam ah om hi. Education lam bang, agriculture lam bang, Roads, Water Supply, technology, electricity leh a dangdang te a sepdi nei uh hi. Hiai nasep di tampi a neihte lak ua khat leh nih khong ahon sepsuah chiang un sem hoihlua ahi diam uh? Etsakna in a term sung ua septheih a neih uh 10 bang hita leh huai 10 laka 8 bang sem khia chih bang hi le tuh semhoih chih theih dingin ka gingta hi. Ahia nasep 10 lak a khat leh nih kia sem khia zaw 10% or 20% kia sem khia ahi a, exam na bang hi leh 3rd division a le pass zoulou toh ki bang a, kipahpih luat na di omlou hi.

Mimal hamphatna mu khenkhat te'n sem hoihlua ahi a chih ziak mai un i MLAte pong kipahpih pah kei ni. A term sung ua a septheih uh bangzah om a, huai teng lak a bangzah a sem suah a, chih a kipan NA SEM HI NA E chih theih pan ding hi. Hiai dungzui a kipahpih pen thil dik leng hi ding a, i gam khantouhna toh leng hong ki tuak ding ahi.

[Written on 11 April 2018]


Print   Email