Thil diklou hihte ziakin ki hih lungkham ken

Thil diklou hihte ziakin ki hih lungkham ken

 Thil diklou hihte ziakin ki hih lungkham nuam ken la, Dikloutak a hihte leng engken. Psalm 37

Tulai ADC Chairman kituh in camp tuamtuam bang a bawl ua, gam khantouhna di deih a phia hi uh hiam i chih leh huai CM Biren in 300 crores package a gen pen deih a Chairman hihna ki tuh uh bang maimah uh hi. Fund teng level tuamtuam ah hong ki hawm ding ua, mipi a di hong omkhalou maimah di ahi.

Tua banah i gam ah fund hong pai himhimte diktak a zat om ngei mahmah lou a, i gam tul deuhdeuh a, mimal pung hulhul in ki om hi. Koi hiam a fund laihkhiak theih khong chettheihna sa in, a ngaisang bang ki tam mahmah lai zomah hi.

I society uah dikloutaka summuh pen ki ngeina seh gawp a, saptuam khong a sum tam pipi a thoh chiang un, hiai sumte siang sa mai dan uh ahi. A chethei deuhte bang saptuam sung ah dinmun hoih taktak tang lai uh hi.

Hichi bang nekguk takguk akipan hausate ngaihtuahna khat a enhuai uh bangmah leh enhuai hetlou hi zaw uh ahi. Dikloutak a summuhna value omlou a, bangmah lou mah a mangthang zel ahi.

Khopi khong ah damlou ki ensak dingin lakh tam pipi khong a seng ding ua, a tate uh khamtheih hih a ki bual ahih kei leh lehkha sim peihlou a mawk om khong ahi kha mai thei uhi. A sum nekgukte uh chik chiang in mi'n hon thei khe ding uh aw chih lau in zan ihmu theilou bang in a om ding ua, insung a kipahna sang in lungkhamna in buak tam zaw maithei ahi uh.

Huchi kawmkal a, mahni loh khiat mah ne a, lungkim tak a om a, nitak nuamtak a imu thei a, damthei taka omte hampha hi zaw uh ahi. Hichi bang values te manpha a, Pathian deihdan leng ahi. I tate leng hiai lampi dik zui dia i thuhilh uh i mohpuak uh ahi.


Print   Email