Watermark leh eilak ethics

Watermark leh eilak ethics

Watermark leh eilak ethics.

Watermark i chih a theilou le i om kha dia, watermark i chih chiangin a tangpi limlak a lemlatu (photographer) in a limlakte a chiamtehna dia a signature/logo a koih genna ahi. Video a leng watermark koih theih ahi.

Tunai in Delhi ah football tournament thupi tak Tamchon hong om a, huai ah kei leng vaisaiten limla dingin hon chial ua, kava la ngei hi.

SSPP FC fans whatsapp group a leng hon add ua, ken le ka limlakte le share in, ngaihdan ka neihte bang le ka share hi. Vaisaiten cup loppah di a sawm louh lai bang un, loppah a hoihdan khong ngaihdan kava kup leh honna munuam khol kei ua, phun peih chih bang ka loh hi (ngaihdan gen khe chiatchiat bang le vaisaite ngaihdan lou lam ahih leh phunna a la mai dante kihi). Huchia ngaihdan tuam deuh nei a mi chiamteh a ka omlai in, ka omna group ua mi tallang khat in ka limlak khat hon post a, ka et leh ka watermark ana ki cut khe chitchiat hi. Ken le ka ngaihdan hilou ahih chiang a, watermark a ki cut khe mawk a, cut khe sese lou in hon post suk leu teh hi di hia ka chih leh, a za ut lou a om taget ua. Huai nung limlak hong ki post teng in watermark a telna maw chi in chiamnuihna in hon zang uh hi. Hiai chiamnuih bawlte bang le naupang ki haisak le hi lou un, Delhi a sepna hoihtak nei a family toh omte khong hizaw mah lai uh hi.

Limla dia hon zawn vaisai pen bang in watermark toh kisai a hon support di ka sak leh "ka limlakte ah watermark ka koih se kei a, na ut nana uah ana tuahsawn un, huchi bang hih na om uh leh tandoori chicken kon khilai ding" chi in chiamnuih in hon gen beh zomah hi. Khonung a ka theih thak leh watermark koihdan theilou ana hi maimah.

Ka ngaihtuahna a zaw eilak mi nasep values leh integrity kizahtaksakna om hetlou ahi chih ka mu khia ahi. Photographers chiatchiat bang le watermark koih ut lou bang le om kha moh ken teh. Ahia khat in a lemlakte a amah nasep chiamtehna a watermark a koih ut a, hon zahtaksak un a chih leh va ki chiamnuih bawl teitei na di om lou hi.

Ethics neitak a nasem mi ka hi. Ka computer sung a operating system leh softwares ka zatte leng license ka lei ngitngiat ahi. Hichi a mi nasep integrity zahtak lou a, Delhi khopi na ngawn a singtang lungsim polai i hih ua le zaw, midang zaw ka thei kei a, kei zaw hichi bang mentality nei lak a nasep zaw ka pelh sawmta ding. Sum hon pia ua lim kava lak le ahi kei a, gam leh nam a dia tawmngai suah a, office kai toh thuah a lim kava lak zomah ahi a, tutung Tamchon tuh kithaman kasa het kei e.

SSPP FC in cup hon lak ka kipahpih a, ahia i sung ua pichinna kitasam omlaite bawlhoih tuak tampi omlai in ka mu. Hiai ka laigelh akipan kua hiam mit a keuh theih khak leh chi a ka hon gelh ahi, phunta vanglak.


Print   Email